ZUMARRAGA
Patrick Süskindek idatzitako lanaren antzerkirako egokitzapena da. Gaueko hamar t'erditan hasiko da
José Ramón Soroiz antzezlanan.
DV. Bihar gaueko hamar t'erditan José Ramón Soroizek Sommer jaunaren istorioa lana antzeztuko du Zelai Arizti aretoan.
Sommer jaunaren istorioa, Patrick Süskind-ek (El perfume nobelaren egileak) idatzitako lanaren antzerkirako egokitzapena da. «13 urtez katalanez ikusgai ondoren, euskarazko tauletara iritsi da. José Ramón Soroizek, Xicu Masóren zuzendaritzapean, haurtzaro eta nerabezaroko pasarteak bizi-bizi gogora ekartzen dituen pertsonaia antzezten digu», esaten dute Txalo antzerki taldetik.
Testua «bizitzaren misterioetan zehar barneratzen den balada eder bat da. Malenkoniaz eta humorez beteriko kontakizun bat, garai ezberdinetan kokatzen dena, ikuslea liluratuko duten ezusteko eta iradokizunez betea».
«Axolagabekeriaren eta ahanzturaren lozorroan gorde ditugun gure osagaiak esnatzen ditu Sommer jaunaren istorioa-k. Agian horregatik hunkitu egiten gaitu eta ongi pasarazten digu eta zirrara eragiten digu», diote Txalo-koek.
